Link açıqlığı

Avgust 24-te Ukraina Mustaqillik Künü Berlin sakinleri – alman, ukrain, belçikalı, israilli ve ruslar – Brandenburg qapuları yanında 24 ukrain müellifiniñ eserlerini almanca ve inglizce oqudılar. Oqulğan eserler arasında – Rusiyede teraktlarnıñ azırlamasında qabaatlanğan ve avgust 25-te mahkeme ükmü çıqarılacaq ukrain rejissöri Oleg Sentsovnıñ pyesası.

Bunı Qırım.Aqiqatqa tedbir teşkilâtçıları olğan «Berlin ukrainleri» teşebbüs gruppası bildirdi.

Sentsovnıñ «Nomera» pyesasınıñ bir parçasını onıñ tercimanı İrina Bondas oqudı. Qapularnıñ yanında Yaroslav Gritsak, Taras Prohasko, Lesâ Ukrainka, Taras Şevçenko, Paul Tselan, Pavlo Tıçına, Lina Köstenko, İvan Franko, Yuriy Andruhoviç, Sergey Jadan, Andrey Bondar, Mıkola Hvılovıy ve digerlerniñ eserleri oquldı. Aktsiyada qırımtatar müellifleriniñ eserleri de oquldı.

Teşkilâtçılarnıñ malümatına köre, rejissör Marina Vroda ve rok-çalğıcı Yuriy Gürjiy oquyıcılar olaraq çıqışta bulundılar.

Ellige yaqın kişi aktsiyağa keldi, olarnıñ arasında dissident ve yazıcı Volfgang Templin, Kiyevdeki Gete-İnstitutınıñ çoq yıllıq müdiri Vera Bagalyants ve digerleri bar edi.

Keçkenler meraqlana edi, dep qayd eteler teşkilâtçılar.

«Bazıları apansızdan flash mobımızğa qoşula ediler, olar ukrain müelliflerini oquğan seslerni eşitip toqtala ediler», – dep aytalar teşkilâtçılar.

Malüm ki, Berlin faalleri Sentsovnıñ «Nomera» spektakliniñ parçalarını oqup, Rusiyede bulunğan ukrain siyasiy mabüsleriniñ taqdirine diqqat celp etecek ediler.

Oleg Sentsov – ukrain rejissöri ve faal, 2014 senesi mayıs ayında Qırımda Rusiye mahsus hızmetleri tarafından yaqalandı ve yarımadadan Rusiyege çıqarılıp, anda SİZOda buluna. Onı Qırımda teraktlar azırlamasında qabaatlaylar.

Avgust 25-te üyleden soñ Sentsovnıñ işi boyunca mahkeme qararı seslendirilmek kerek. Bu kün Ukraina Rusiye Federatsiyası elçihanesiniñ binası yanında «Qırım reinelerini» azat etmek talabı ile miting ötkerilmek kerek.

XS
SM
MD
LG