Link açıqlığı

Saatnıñ esas haberi

Aksenovdan qırımtatar balalarına ana tilinde tasil almaq aq-uquqlarını temin etmege rica eteler


«Maarifçi» qırımtatar tasil hadimleriniñ birleşmesi 2015-2016 oquv yılınıñ arfesinde Qırımnıñ Rusiye yolbaşçısı Sergey Aksenovğa muracaat etip, yarımadada qırımtatar tilinde tasil aluv problemleriniñ al etilmesi içün areket etmege tevsiyede bulundı.

Bu aqqında muracaatta aytıla, birleşme «halqnıñ milliy tasil saasında felâket alda bulunğanına» diqqat ayırmağa rica ete.

«26 yıl içinde qırımtatar halqı vatanına qayta, Qırımda yañı nesil ösip çıqtı. Qırımtatarlarnıñ bu nesili ekseriyette ana tilini yeterli derecede bilmey, ana-babaları ve cemaat bu sebepten qasevetleneler, çünki ecdatlarnıñ tilini bilmegen insan halqnıñ medeniyetini tolusınen añlamaz, ecdatlarnıñ mirası, milliy ananeleri, tarihına bütünley qoşulamaz», – dep aytıla muracaatta.

Tasil hadimleri yarımada mekteplerinde qırımtatar tiliniñ ögrenilmesine ayırılğan saatlerniñ qısqartılması, Qırım deputatlarınıñ işbu vaziyetni deñiştirmek istekleri olmağanını, tasil müessiseleriniñ reberleri tarafından ana tilinde tasil alacaq sınıflarnıñ talebe sayısınıñ bozulmasını qayd eteler.

«Maarifçi» qırımtatar tasil hadimleriniñ birleşmesi qırımtatar halqı balalarınıñ ana tilini ögrenmek ve ana tilinde tasil almaq anayasa aq-uquqlarına riayet etilsin dep, Qırım Cumhuriyetiniñ yolbaşçısı S.V.Aksenovğa muracaat etip, tasil, ilim ve gençlik naziri N.G. Gonçarovağa 2015-2016 oquv yılı arfesinde qırımtatar tilinde tasil saasında olğan problemlerni al etmege avale etmesini rica ete», – dep aytıla muracaatta.

Qırım tasil naziri Natalya Gonçarova bildirdi ki, yarımada mektepleri bu sene qırımtatar tilinde kitaplarnı alamaycaqlar.

Qırımtatar Milliy Meclisi ve cemaat faalleri bergen malümatına köre, Qırım Rusiye nezareti altına keçken soñ yarımada mekteplerinde devlet tilleriniñ ögrenilmesi içün saatler adaletli şekilde ayırılmay.

Qırımda «Qırım Cumhuriyetiniñ Anayasasına (madde 10)» köre üç devlet tili bar – qırımtatarca, rusça, ukraince.

XS
SM
MD
LG