Qurultay Merkeziy saylav komissiyasınıñ reisi Zair Smedlâyev bildire ki, avgust 24-te Qırımnıñ Yüksek mahkemesi «fevral 26 işi» boyunca yaqalanğan Qırımtatar Milliy Meclisiniñ reis muavini Ahtem Çiygoz ve faal Ali Asanovnıñ imayesi bergen şikâyet arizalarını red etti.
Onıñ malümatına köre, Yüksek mahkeme Çiygoz ve Asanovğa Aqmescitniñ Kiyev rayon mahkemesi çıqarğan ükümlerini deñiştirmedi.
«Mahkeme qararları deñişmedi, noyabr 19-ğa qadar apis cezası», – dep yazdı o Facebookta.
Qırımnıñ uquq qoruyıcı ve mahkeme organları bunı izaatlamaylar.
Qırım mahkemesi Asanovnı 2014 senesi fevral 26-da Qırım Yuqarı Radası yanında «Rus birligi» firqasınıñ tarafdarlarına nisbeten zorbalıq areketlerinde qabaatlay.
O vaqıt Qırım parlamenti yanında Meclis ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birligi» lideri Sergey Aksenov teşkil etken ediler. Çatışma neticesinde eki insan elâk oldı. Rusiye Taqiqat komiteti cinaiy işni açtı.
Onıñ taqiqatı çerçivesinde Meclis reisiniñ muavini Ahtem Çiygoz «kütleviy çatışmalarnı teşkil etüv ve iştirak etüvde» şeklenip, aqımdaki seneniñ yanvar 29-da yaqalandı. Onıñ apis müddetini noyabr ayına qadar uzattılar.
