Rusiye istilâsı neticesinde eki biñden ziyade ukrain askeri elâk oldı, yedi biñden ziyade yaralandı, dep bildirdi Ukraina prezidenti Petro Poroşenko avgust 24-te Kiyevde Ukraina mustaqillik Künü munasebetinen olıp keçken yürüşte.
«Mustaqillik künü İlovaysk civarındaki deşetli facianıñ yıllığına aman-aman teñ kele, onıñ neticesinde Rusiye ordularınıñ bölükleri Ukrainağa ücüm etti. Bir yıl keçti, bu teren yara qapanmadı, ağrı – keçmedi. Qomşu devletniñ istilâsı aman-aman eki biñ yüz askerimizni öldürdi. Serbest, mustaqil Ukraina içün canını feda etken qaramanlarnı unutmayıq. Şan-şüret olsun olarğa!», – dep ayttı prezident.
Tedbirlerniñ iştirakçileri elâk olğanlarnı añdılar.
2014 senesi aprel ayından itibaren Ukraina şarqında Rusiyege qoltutqan separatistlerge qarşı cenk areketleri devam ete. Ukraina akimiyeti ve Ğarp Rusiye Donbass boyeviklerine silâ bere, dep aytalar. Moskva bunı red etip, ukrain şarqında Rusiye «göñüllileri» bar olğanını bildire. Rusiyeniñ Ukraina şarqında yapqanları ve Qırım işğali sebebinden oña qarşı halqara sanktsiyalar devam ete.
Birleşken Milletler Teşkilâtınıñ malümatna köre, Ukraina şarqındaki zıddiyet neticesinde 6800 insan elâk oldı.
Fevral ayında tizilgen Minsk añlaşmalarına köre, Donbassta ateş toqtatılmaq kerek, lâkin bu añlaşmalar sıq-sıq bozula, taraflar ise bir-birini qabaatlaylar.
