Link açıqlığı

Saatnıñ esas haberi

Qırım ile memuriy sıñırda ukrain sıñırcıları Mustaqillik künü ile hayırlaylar


Sıñırcılar qırımlılarnı Ukraina mustaqillik Künü ile tebrikleyler (video)
Bekleñiz, lütfen

No media source currently available

0:00 0:01:24 0:00

Ukraina Devlet sıñır hızmetiniñ hadimleri Qırım ile memuriy sıñırdaki kiriş noqtalarında adamlarnı Mustaqillik künü ile tebrikleyler.

Qırım.Aqiqat mühbiri bildire ki, bazar kününden berli «Kalançak» kiriş noqtasında beyaz kölmekli qızlar tura. Olar istegi olğan er keske sarı-mavı şeritlerni bağlaylar.

«Qırımdan kelgen vatandaşlarğa risaleler beremiz. Mustaqillik künü ve Bayraq künü ile hayırlaymız», – dep ayttı sıñır hızmetiniñ hadimlerinden biri Yelena Mihetko.

«Sıñırda» adamlar buña farqlı baqalar, bazıları ayrette qala, bazıları külümsirey, digerleri ise açuvlanalar.

Aydavcılardan biri bu kün «ukrain akimiyetine açuvlanğanını» ayta.

«Başta Qırımnı berdik... şimdi ise ağlap oturamız», – dedi er kişi.

Bazıları içün Ukraina mustaqillik Künü közyaş doğura.

«Evge barğanını is etmek içün Qırımda yaşap baqmaq kerek», – ağlap ayttı qadın.

Adamlarnıñ çoqusı qıtaiy Ukrainağa iş meselelerinen kete, lâkin Qırımda yasaq etilgen bayramnı qayd etmek içün çıqqanlar da az degil.

«Mustaqillik kününi evde, Ukrainada, Kiyevde qayd etmek isteyim!», – külümsirep ayttı qadın.

Qırım.Aqiqat mühbiri qayd ete ki, sıñırcılarnıñ pasport kontroli masasında Ukraina bayrağı yata, adamlar anda bir şey yazalar. Devlet sıñır hızmetiniñ Azaq-Qara deñiz regional idaresi yolbaşçısınıñ yardımcısı Maksim Soroka ayta – bu bayraq ATO askerlerine berilecek.

«Siziñ içün dua etemiz! Qırım – Ukrainadır! Sağ qaytıñız! Sizni bekleymiz! Sağ oluñız! Qırım sizni bekley!», – sıñırcı bayraqtaki yazılarnı seslendirdi.

Ukraina devlet sıñır hızmetiniñ hadimleri Qırımğa ketkenlerni de selâmlaylar, lâkin bir şey bermeyler, çünki Rusiye hızmetleri nezaret etken kiriş noqtalarında adamlarnıñ problemleri peyda ola bile.

Bazarertesi künü, avgust 24-te, Ukrainada Mustaqillik künü qayd etile. 24-ünci doğğan künü munasebetinen memlekette tantanalı tedbirler keçirilecek. Tünevin Ukrainada Bayraq kününi qayd ettiler.

Eki yıldan berli bu bayram Rusiye tarafından işğal etilgen Qırımda qayd etilmey. Aqmescitteki cemaat faalleri Ukraina mustaqillik Künü munasebetinen aktsiyanı keçirecek ediler, lâkin Aqmescitniñ şeer memuriyeti buña izin bermedi.

2014 senesi mart ayında Rusiye Qırımnı işğal etken soñ qıtaiy Ukraina ve yarımada arasında memuriy, asılında ise tam bir sıñır peyda oldı. Qırım vaqtınca işğal etilgen topraq sayıla.

XS
SM
MD
LG