Ukraina baş naziri Arseniy Yatsenükniñ fikirince, «dünya Qırım işğalini iç bir vaqıt tanımaz», şunıñ içün yarımada mıtlaqa Ukrainağa bağlı olacaq.
Bunı ukumet reisi avgust 23-te Ukraina mustaqillik Künü munasebetinen «baş nazir ile 10 daqqada» ayttı, dep haber ete Ukraina Nazirler şurasınıñ saytı.
«Ukrainler o qadar emek bergen yarımada mıtlaqa ukrain olacaq. Ukraina akimiyeti Rusiye yoq etken qanunnı, azatlıqnı, qırımtatarlarnıñ, milliy azlıqlarnıñ aq-uquqlarını ve insan itibarını Qırımğa qaytaracaq», – dep qayd etti ükümet reisi.
Yatsenük bildirdi ki, «Qırımnı zapt etkenler, Donetsk ve Luganskqa terroristlerni yollağanlar halqara mahkeme ve tarih tarafından cezalanacaqlar».
2015 senesi aprel ayında Ukraina Baş prokuraturası Gaagadaki Halqara cinaiy mahkemege berilecek Rusiyeniñ Qırım işğaline dair malümatlarnı azırladı.
