Bazar künü, avgust 23-te, «Baar» («Vesna») areketiniñ faalleri Sankt-Peterburgnıñ Nevskiy caddesinde levhalar ile birer-birer piketlerge çıqtılar: «Ukrainağa eyi sözler yazıñız». Olardan biri Nevskiy caddesi ve Malaya Sadovaya soqağınıñ köşesinde «Rusiye poçtası» qutusını qoydı, er kesniñ Ukraina sakinlerine eyi sözler ile kâğıtnı qaldırmağa imkânı bar edi, dep haber ete Radio Svoboda.
Bu aktsiya «Dostluq yazı» («Leto drujbı») kampaniyasınıñ soñki, beşinci aktsiyası edi, Rusiyeniñ diger şeerleri de aktsiyağa qoşuldı – Voronej, Tomsk, Krasnodar, Tolyatti, Novokuznetsk.
«Er keske hatırlatmaq isteymiz: rus, ukrainlerge – qardaş halqlarmız ve böyle de qalmaq kerekmiz. Bizni birleştirgen çoq şey bar: tarih, medeniyet, soy-sop bağları – siyasetçilerden ğayrı, er şey», – dep yazdılar teşkilâtçılar internet muracaatında.
Areketniñ matbuat kâtibi Anton Gorbatseviç dey ki, qutuğa atılğan bütün mektüpler Ukrainağa yollana, anda ise «Baar» faalleriniñ ortaqları olarnı dağıtalar.
«Ukrainler buña farqlı yanaşalar: bazıları quvana, digerleri keç olğanını, cenk başlağanını ve elâk olğanlarnı mektüpler qaytaramaz, dep aytalar. Bizim vatandaşlarımız buña yahşı davranalar, yazacaqlar nevbetlerge tizile. Açuvlanğan insanlar da bar, amma pek az», – dedi o.
Rusiye faalleri bu kampaniyanı muvafaqiyetli dep sayalar. İyün 12-den itibaren, «Dostluq yazı» birinci aktsiyası keçirilgende, avgust 23-ke qadar biñden ziyade mektüp toplandı.
