Novoalekseyevkanıñ (Geniçesk rayonı, Herson vilâyeti, Ukraina) «Rodniçok» ve «İvuşka» bala bağçalarında bu sene qırımtatar sınıfları açıla, dep haber ete QHA.
Böylece, «Rodniçok» bala bağçasında 3-6 yaşında balalar içün qırımtatar tilli qarışıq gruppalarnı açmaq imkânı bar. Bala bağçasında qırımtatar terbiyecisi çalışa.
Mektepten aldın oquv yurtlarınıñ reberleri Novoalekseyevka qasabasınıñ şurasına muracaatta bulunıp, «Rodniçok» ve «İvuşka» mektepten aldın oquv yurtlarınıñ nizamnamelerine til deñişmelerini kirsetmege rica ettiler. İşbu oquv yurtları belgilengen şekilde nizamnamelerni qayd etmek kerekler.
Novoalekseyevkanıñ bala bağçalarında qırımtatar gruppalarınıñ açılması – Geniçesk rayon memuriyeti azırlağan 2015-2016 senesi içün qırımtatarlarnıñ milliy anane ve medeniyetini inkişaf ettirmek ve qırımtatar tilinde tasil almaq aq-uquqlarını yerine ketirmek tedbirler planınıñ bir qısmıdır.
Geniçesk rayonınıñ memuriyet yolbaşçısınıñ muavini, Qırımtatar Milliy Meclisiniñ azası Gülnara Bekirovanıñ aytqanına köre, yañı oquv yılında bala bağçasında qırımtatar gruppasınıñ açılması – rayon içün eñ müim tedbirlerden biridir. Memurnıñ qayd etkenine köre, eskiden Novoalekseyevkada qırımtatar gruppası bar edi, amma soñra onı qapattılar.
Aqımdaki seneniñ sentâbr ayında bala bağçalarında qırımtatarlarnıñ ananeleri ve turmuşını aks etecek köşeçiklerniñ azırlanması beklenile. Bu işke Qırımtatar Milliy Meclisiniñ regional bölük temsilcileri, ana-babalar ve qasaba cemaatı celp etilecek.
Hatırlatamız, 2014 senesi mart 20-de Yuqarı Rada qırımtatarlarnı Ukrainanıñ tamır halqı olaraq tanıdı. 283 deputat bu qararğa qoltuttı.
Ukraina qırımtatarlarnıñ ve Ukrainanıñ bütün milliy azlıqlarınıñ etnik, medeniyet, til ve din hususiyetlerini saqlap qalmaq ve inkişaf ettirmek kefilini berdi.
