Aqmescitte belgisiz şahıslar Ukraina Devlet bayrağı künü munasebetinen Taras Şevçenko eykeline qoyulğan çeçek demetini yırtıp taşladılar, dep haber ete Qırım.Aqiqat.
Yerli sakinlerniñ bildirgenine köre, saba eykel yanında mavı ve sarı renklerde demetler peyda oldı. Lâkin saat 15-lerde çeçeklerni yırtıp taşladılar. Mavı kâğıtqa sarılğan demetten sarı çeçekler çıqarıldı ve etrafqa dağıtıldı.
Bazar künü, avgust 23-te, Ukraina Devlet bayrağı kününi qayd ete.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
