Link açıqlığı

Aqmescitte faallerge Ukraina mustaqilligi Künü munasebetinen tedbirni keçirmege izin bermediler


Aqmescitteki Taras Şevçenko eykeli, arhiv fotoresimi

Aqmescitniñ Rusiye akimiyeti Ukraina mustaqilligi Künü ile bağlı tedbir keçirilmesine izin bermedi. Bunı cuma künü, avgust 21-de, Ukrain medeniyet merkeziniñ teşkilâtçılarından biri Leonid Kuzmin bildirdi, dep haber ete Qırım.Aqiqat.

Kuzmin Aqmescit memuriyeti bergen red vesiqasınıñ kopiyasını Facebook saifesinde yerleştirdi.

«Bugün yaramay haberler! Aqmescit şeeriniñ memuriyetine avgust 24 künü Ukraina mustaqilligi Künü munasebetinen keçirilecek olğan tedbir aqqında haber etilgen soñ şeer akimiyeti tedbir keçirilmesini yasaq etti. Sebebi ise vaqtında berilmegen ariza oldı», – dedi Kuzmin.

Onıñ aytqanına köre, böyle etip avgust 24-te Ukraina mustaqilligi Kününe bağışlanğan tedbir keçirilmeycek.

Leonid Kuzmin bu kün Taras Şevçenkonıñ eykeline çeçek qoyacaq olğan insanlarnı diqqatlı ve muqayt olmağa çağırdı.

Qırım.Aqiqat bildirgeni kibi, Qırımda Rusiye uquq qoruyıcıları Ukrain medeniyet merkeziniñ faalleri Veldar Şukurciyev ve İrina Kopılovanı yaqaladılar, olar Ukraina bayrağı ile foto çıqaracaq ediler.

Mart 9-da ukrain şairi Taras Şevçenkonıñ hatıra aktsiyasında bir sıra ukrain faali, şu cümleden, Veldar Şukurciyev de yaqalanğan ediler.

Soñra mahkeme olıp keçti, faallerni ukrain timsallerini qullanğanlarından sebep cezaladılar. Er birine 40 saatlik mecburiy işler berildi. Tezden bazı faallerniñ mecburiy işleri para cezasına deñişti.

XS
SM
MD
LG