Bu oquv yılında Qırım mektepleri qırımtatarca basılğan kitaplarnı almaycaqlar. Qırımnıñ Rusiye tasil, ilim ve gençlik naziri Natalya Gonçarova Krıminformdaki matbuat konferentsiyasında bildirdi ki, mektep dersliklerini yılnıñ soñuna qadar qırımtatarcağa tercime etmek kerekler, soñra «Prosveşçeniye» neşriyatı olarnı neşir etmege başlaycaq, dep haber ete «Krıminform».
Rusiye Federatsiyasınıñ tasil ve ilim naziri Dmitriy Livanov bir yıl evelsi Qırımnı ziyaret etip, kelecek oquv yılında qırımtatarca ve ukraince yañı ders kitapları olacağını vade etken edi.
Gonçarovanıñ aytqanına köre, kitaplarnı tercime etken gruppa teşkil etildi, mektep programmasınıñ bütün derslikleri qırımtatar tiline tercime etilecek: riyaziyat, fizika, himiya, biologiya ve digerleri.
«Müellif aqı bu dersliklerni bergen neşriyatlarğa ait. Olarnen iş tutmağa devam etecekmiz», – dep añlattı Gonçarova. Kitaplarnıñ basılmasına 49 mln ruble lâzim, olardan 15 mln rub endi elde etildi.
«Bu yılnıñ soñuna qadar tercime işlerini bitirmek içün bu para yeter», – dep ayttı nazir.
Onıñ bildirgenine köre, qıımtatar tiliniñ fakultativ olaraq ögrenilmesi içün derslikler oktâbr 1-ge qadar mektepler arasında dağıtılacaq, «ocağa usuliy derslik yeter».
Qırım tasil naziri dey ki, qırımtatar tilli mektepler çalışmağa devam ete.
«15 mektep bar ve 15 danesi çalışacaq. Bundan ğayrı, qırımtatarca tasil alğan 29 sınıfqa başlanğıç mektepniñ daa 3 sınıfı qoşulacaq», – dep ayttı Gonçarova.
Qırımtatar tilli mektepler 100% tolu degil. 464 talebeni sığdıra bilgen Qarasuvbazar mektebinde 299 talebe bar, Aqmescitteki mektepte 700 talebe yerinde 400 kişi oquy.
