Qırımda yaşağan ve hac ibadetini qılmağa niyetlengen qırımtatarlar Ukraina vatandaşınıñ çetel pasportı ile bunı qolay yapa bileler. Bunı «Umma» Ukraina musulmanları diniy idaresiniñ müftisi Said İsmagilov bildirdi.
«Acılıqqa baracaq olğan qırımtatarlarnıñ Ukraina vatandaşı ve Ukraina vatandaşınıñ çetel pasportı olsa, olar acılıqqa raat bara bileler», – dep ayttı o Qırım.Aqiqatqa.
Onıñ bildirgenine köre, Ukrainağa acılar içün 200 yer berildi. Amma niyeti olğanlarnıñ bazı vaqıtları parası yetmey.
«Er vaqıt adam az, 100 kişi bara, 120 – eñ ziyade. Yani, Qırımdan acılıqqa baracaq er bir kişi çetel pasportı (Ukraina vatandaşınıñ – QA) ve parası olsa, lütfen, buyursın», – dep qayd etti müfti.
O, Qırımnıñ Rusiye akimiyetiniñ Qırım acılarına Rusiye vatandaşlarınıñ biometrik çetel pasportları berilecek kibi laflarını izaatlap, böylece qırımtatarlarnı «öz tarafına çekmege» tırışqanlarını qayd etti.
«Bu siyasettir. Rusiye Qırımdaki qırımtatarlarnı celp etecek ola, öz tarafına çekecek ola, bu da usulardan biri», – dep qayd etti o.
Ukrain musulmanlarınıñ acılığı meselesinen «Cosmos Travel Star» turistik şirketi oğraşa. Turistik operatornıñ ofisi Qırım.Aqiqat mühbirine bildirdi ki, Qırımdan acılıqqa baracaqlar bar, lâkin sayısı gizli qala.
Malüm ki, Qırımnıñ Rusiye baş naziriniñ muavini Ruslan Balbek avgust 15-ke qadar acılıqqa baracaq 300 qırımtatarı Rusiye biometrik çetel pasportını alacaq, dep aytqan edi.
Ukraina prezidentiniñ qırımtatar halqı işlerinden vekâletlisi Mustafa Cemilev bildirdi ki, Rusiye Federatsiyasınıñ yerlerinden faydalanacaq qırımlılar qanunnı bozacaqlar.
«Elçihane yalan aytqanlarını, Rusiye Federatsiyasınıñ diger regionlarında berilgen pasportlarnı köstergenlerini añlasa, bu güna olacaq, ve olarnı Saudiy Arabistandan quva bileler. Böyle bir añlaşmamız bar», – dep ayttı Mustafa Cemilev Qırım.Aqiqatqa.
Berilgen malümatqa köre, Saudiy Arabistan 200 Qırım acısına maddiy yardım köstermege azır. Bunı Ukraina prezidentiniñ qırımtatar halqı işlerinden vekâletlisi Mustafa Cemilevniñ Ukraina Saudiy Arabistan Qırallığınıñ fevqulâde ve vekâletli elçisi Cudiya Alhazal ile körüşüvinden soñ ayttılar.
Hac ibadeti – islâm dininiñ beş farzlarından biridir. Er bir musulman acılıq ibadetini yerine ketirmeli.
