Devlet hainligi tömeti lâğu etilgen Qırım Yuqarı Şurasınıñ sabıq deputatı Safure Kacametova Ukraina Baş prokuraturası yanındaki QMC prokuraturası oña maneviy zarar ketirgenini bildirdi.
Bunı o Qırım.Aqiqatqa bergen izaatında ayttı.
«Başta çorlandım. Namus ve şerefime maneviy zarar ketirdiler. Mında, Qırımda öşeklerge sebep oldı. Bunı men bir kerginlikte yaşadım», – dedi Kacametova.
O şunı da dedi ki, QMC oña qarşı cinaiy işni qapatmağa borclu edi, çünki «Qurultay-Ruh» firqası 2014 senesi fevral 26-dan soñ Qırım parlamentiniñ toplaşuvlarında iştirak etmey edi.
Ukraina Baş prokuraturası yanındaki QMC prokuraturası QMC Yuqarı şurasınıñ sabıq deputatı Safure Kacametovağa nisbeten devlet hainligi tömetini lâğu etti. Bunı Kiyevde avgust 20 künü keçirilgen matbuat konferentsiyasında QMC prokurorınıñ birinci muavini Nazar Holodnitskiy bildirdi
Yaqında matbuat vastalarında Ukrainada devlet hainliginde şeklengen Qırım Yuqarı Şurasınıñ sabıq deputatlarınıñ adları peyda oldı. Qırımtatar Milliy Meclisiniñ yolbaşçılığı bildirgeni kibi, qıdıruvğa ilân etilgen deputatlar sırasına Ukrainağa qarşı areketlerge qoşlumağan soyları da kirdi. Meclis reisi Refat Çubarovnıñ fikrine köre, «satqınlar cedveline» «Qırım regionları» firqasınıñ sabıq deputatı Enver Abduraimov ve «Qurultay-Ruh» firqasınıñ temsilcisi Safure Kacametova sebepsiz kirdi.
