Türkiyede yaşağan ukrainler Ukraina Mustaqilligi künü munasebeti ile video hayırlavını yazdılar. Bu aqta Türkiye Cumhuriyetinde Ukraina elçihanesi bildire.
«Vatanımız içün bu ağır vaqıtta bütün dünya musulmanları Ukrainanıñ bahtlı kelecegi içün birleşe, toprağımızğa barışıqnıñ qaytmasını arz ete. Türkiye Cumhuriyetinde Ukraina elçihanesi ve İstanbulda Ukrainanıñ Baş konsullığınıñ teşebbüsine qol tutıp, ukrain rejissörı Marina Er-Gorbaç ve Türkiye prodüsseri Bagadır Er ukrain cemiyeti balalarınıñ iştiraki ile Ukraina Mustaqilligi künü munasebeti ile bu videonı çıqardılar», – qayd eteler elçihanede.
Beyanatta bildirilgeni kibi, Türkiyede yaşağan ukrainler bu ğayeni eyecan ile qarşıladılar ve onıñ amelge keçirilmesine faal sürette qoşuldılar. 50 saniye devam etken videoda ukrain kiyiminde balaçıqlar minareler fonunda donatılğan sofra başında toplandılar. Sofra ortasında gögercinniñ resmi ve sulh tilegi ile tort tura.
Videoğa muzıkanı aslı ukrain bestekârı Yuriy Râdçenko azırladı.
Ukraina Mustaqillik Kününi avgust 24 künü qayd ete.
Bildirilgeni kibi, Türkiye Ukraina topraq bütünliginiñ tarafdarı olğanını ve Rusiye tarafından Qırım işğalini tanımağanını defalarca aytqan edi.
