Ukraina haber siyaseti naziriniñ keñeşçisi Sergey Kоstinskiy «Qırım – Ukraina» kampaniyasınıñ çetelde peyda olğanı aqqında bildire.
«Qırımlılar Liza Bogutskaya, Vladislav Seleznev, Aleksandr Yankovskiy, Оlga Duhniç, qırımtatarları Sevgil Musayeva-Borovik ve Ahtem Seytablayev öz mevamını (Men – Ukraina vatandaşım) qıtalardan er birinde bildirdiler», – yazdı Kоstinskiy Facebookta.
Bu kibi levhalar, şu cümleden, Kanadada peyda oldı.
Onıñ malümatına köre, nevbetteki adım – çetelde Ukrainanıñ mültimedia platformasınıñ işlettirilmesi olacaq.
«Dünyanıñ er yerinde, Antarktidadan ğayrı, ğaliba, millionlarce insan Rusiye – istilâcı, Qırım – Ukraina olğanını bilecek», – dey Kоstinskiy.
Evel Sergey Kostinskiy Ukraine tomorrow efirine «Golos Krıma», «Krım live», Zaman ve Qırım.Aqiqat kibi programmalarnıñ kirsetilecegini bildirgen edi.
Kampaniyanıñ sımaları qırımlılar oldı: Ahtem Seitablayev – rejissör, prodüser, müellif, «Hrabrıye serdtsa» leyhasınıñ alıp barıcısı, Olga Duhniç – siyasiy psiholog, «Novoye vremâ» mecmuasınıñ jurnalisti, Sevgil Musayeva-Borovik – «Ukrainskaya pravda» internet neşiriniñ baş muarriri, Vladislav Seleznev – podpolkovnik, Ukraina Silâlı quvetleri Baş ştabı matbuat hızmetiniñ yolbaşçısı, Liza Bogutskaya – bloger, dizayner, Aleksandr Yankovskiy – «Çernomorskaya teleradiokompaniyanıñ» baş prodüseri, «Qırım.Aqiqat» teleleyhasınıñ reberi.
2014 senesi mart 16-da Qırımda ve Aqyarda sahte referendum olıp keçti, onıñ neticesinde Rusiye Qırımnı öz terkibine qabul etti. Ukraina ve Ğarp bunı tanımayıp, Rusiye Qırımnı işğal etkenini bildireler.
