Ukraina Baş prokuraturası yanındaki QMC prokuraturası QMC Yuqarı şurasınıñ sabıq deputatı Safure Kacametovağa nisbeten devlet hainligi tömetini lâğu etti.
Bunı Kiyevde avgust 20 künü keçirilgen matbuat konferentsiyasında QMC prokurorınıñ birinci muavini Nazar Holodnitskiy bildirdi, haber ete Qırım.Aqiqat.
Onıñ aytqanı kibi, devlet hainligi tömeti sabıq deputattan avgust 19 künü alındı.
«Taqiqat areketlerini keçirdik, bu vatandaşlarnıñ (Safure Kacametova, Enver Abduraimov – Q.A) devlet hainligine alâqasını teşkerdik ve tünevin Kacametovağa nisbeten cinaiy iş, qabaatı tasdiqlanılmağanı sebebinden, qapatıldı», – añlata Holodnitskiy.
Bunıñ ile Holodnitskiy Qırımnıñ sabıq deputatı Enver Abduraimovğa nisbeten tömet lâğu etilmegenini qayd ete.
Bunıñ ile o şunı aytıp keçti ki, böyle cedvellerniñ tizilüvi devam etecek. «İnsanlar öz qaramanlarını bilmek kerek», – dey Holodnitskiy.
Yaqında matbuat vastalarında Ukrainada devlet hainliginde şeklengen Qırım Yuqarı Şurasınıñ sabıq deputatlarınıñ adları peyda oldı. Qırımtatar Milliy Meclisiniñ yolbaşçılığı bildirgeni kibi, qıdıruvğa ilân etilgen deputatlar sırasına Ukrainağa qarşı areketlerge qoşlumağan soyları da kirdi. Meclis reisi Refat Çubarovnıñ fikrine köre, «satqınlar cedveline» «Qırım regionları» firqasınıñ sabıq deputatı Enver Abduraimov ve «Qurultay-Ruh» firqasınıñ temsilcisi Safure Kacametova sebepsiz kirdi.
