Rusiye prezidenti Vladimir Putin Qırım kiriş noqtalarında gümrük ve nezaretniñ diger şekillerini arttırmağa avale etti.
Bu aqta Rusiye devletiniñ başı Qırımda avgust 19 künü qanuniyet ve nizamnıñ teminlevi boyunca muşaverede bildirli, haber ete Kreml saytı.
«Qırımğa afyonnıñ ve keyfiyetsiz ve yasaqlanğan malnıñ ketirilmesini toqtatmaq. Yolcu ve yükniñ ketirilmesi vaqtında qanuniyetke riayet etilmesine de diqqat ayırmaq kerek», – dedi Putin.
Avgust 6-dan Rusiye ve onıñ tarafından işğal etilgen Qırımda Moskvağa qarşı iqtisadiy cezalarğa qoşulğan memleketlerden ketirilgen malnı yoq etmege başladılar.
2014 senesi Qırımnıñ Rusiye tarafından işğal etilgeninden soñ qıtaiy Ukraina ve yarımada arasında resmiy şekilde – memuriy, amelde ise – aqiqiy bir sınır peyda oldı. Qırım vaqtınca işğal etilgen territoriya olaraq adlana.
