Amerika boksçusı Roy Jones işğal etilgen Qırımğa keldi ve mında avgust 23 künü keçirilecek boks yarışında musafir olaraq çıqışta bulunmaq niyetindedir. Bu aqta Jonesniñ Rusiyede meneceri olğan Vladimir Hrünovğa esaslanıp, TACC bildire.
Bildirilgeni kibi, çarşenbe künü, avgust 19-da, Roy Jones Aqyarda Rusiye prezidenti Vladimir Putin ile körüşti. Putin Jonesniñ «Rusiyede yaşamağa niyeti olsa», oña Rusiye vatandaşlığını bermege vade etti.
TACC bildirgeni kibi, Roy Jones «sport Rusiye ve AQŞ arasında köpür qurmağa yardım etecegine ümüdini bildirdi».
«Bizde er vaqıt farqlı munasebetimiz bar edi, amma bunı em Rusiye, em Amerikanıñ menfaatı talap etkende, er vaqıt özümizde küç tapıp, munasebetlerimizni eyileştire edik», – dey Roy Jones.
Malüm olğanı kibi, promouter Hrünov, Jones Rusiye tarafından Qırım işğalini takbih etken AQŞ mevamına nasıl davrana degen sualge cevap bergende, Roy Joneste Qırım ziyareti «iç te sual doğurmadı» dep ayttı.
«Qayda ketesiñ?» yazğan insanlar bar edi O: «O yerde özümni yahşı is etem, em de meni anda seveler», kibi cevabını qaytara edi», – dey Hrünov.
Aynı zamanda boksçunıñ resmiy saytında Qırım ziyareti aqqında bir şey yazılmay.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar. Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
