Ruise prezidenti memuriyetiniñ başı Sergey İvanov Qırımda Vorontsov sarayına 450 biñ ruble iane etti. Müzey saytında bildirilgeni kibi, İvanov «öz şahsiy parasını» iane etti.
«Sergey Bоrisoviç ziyareti çerçivesinde saray-müzeyge yardım köstermege söz berdi. Moskvağa qaytıp, Rusiye prezidenti memuriyetiniñ başı sözüni tuttı ve qoruq-müzeyniñ inkişafı ve sergi salonlarınıñ ğayrıdan quruvına öz şahsiy parasından 450 biñ ruble yolladı», – denile beyanatta.
Alupka saray-bağça qoruq-müzeyiniñ memuriyeti İvanovğa «Qırımda Rusiye Federatsiyasınıñ medeniy asabalığınıñ incisi olğan Vorontsov sarayınıñ saqlanılması ile bağlı qayğıruvı içün» minnetdarlığını bildire.
Vorontsov Sarayı XIX asırnıñ başında Novorossiysk divarı valisiniñ graf Mihail Vorontsovnıñ yaz iqametgâhı olaraq quruldı.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar. Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
