Qırımtatar halqınıñ aq-uquqlarını qorçalav komitetiniñ idarecisi, Meclis azası Eskender Bariyev dey ki, Qırımda «yarımada saibi» olaraq Rusiye prezidentine bağışlanğan timsaliy «altın beşik» – «qırımtatar, qaray ve qırımçaqlarnıñ degerlikleri, namus, serbestlik ve mustaqilliginiñ aqaretlevi»dir.
«Çünki, efsanege köre, ecdatlarımız altın beşkini toprağımıznı zapt etmege ve halqnı dünya yüzünden silmege istegen duşmandan qobada saqlağan ediler», – yazdı Bariyev Facebookta.
O, işbu «bağışlavda» iştirak etken qırımtatarlarnı da tenqit etti.
«Bu adisede qırımtatarlarnıñ iştiraki… Olarğa qıymet kesmege bile qıyın… Allah er şeyni köre… Yani, bu vicdannı, can, namus, serbestlik ve mustaqillikni bermek, ananı satmaq ya da duşmannı yataq odasına kirsetmek kibi», – dey Bariyev.
Yaltada Rusiye prezidenti Vladimir Putinge Qırımnıñ milliy cemaat teşkilâtlarınıñ temsilcileri ile körüşüvde timsaliy Altın beşikni bağışladılar.
Qırımnıñ regional alman milliy-medeniy muhtariyetiniñ reisi Yuriy Gempel degeni kibi, bu aqta «qadimiy efsaneler» bar eken.
«Qırımda qadimiy, ğayet qadimiy bir efsane bar. Bu efsanede Qırımda saqlanılğan Altın beşik aqta söz kete, bu beşikniñ saibi – Qırım, sulh ve fikirdeşlik saibi olacaq», – dey Gempel.
Bazarertesi künü, avgust 17-de, Yaltada Rusiye prezidenti Vladimir Putin Rusiye Devlet şurası prezidiumınıñ turizm inkişafı boyunca toplaşuvını keçirdi.
Ukraina prezidenti Petro Poroşenko Rusiye prezidenti Vladimir Putinninniñ Ukraina tarafı ile uyğunlaştırılmağan Qırım ziyaretini – medeniy dünyağa qarşı areket olaraq adladı. Ukraina Tış işler nazirligi Rusiye prezidenti Vladimir Putin ve baş naziri Dmitriy Medvedevniñ işğal etilgen Qırım ziyaretine narazılığını bildirdi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar. Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta
Rusiye prezidentiniñ ziyareti devam ete. Putinniñ malümatına köre, çarşenbe künü, avgust 19-da, o Qırımda uquq qoruyıcılarnen körüşmek niyetindedir.
