Qırım şeerlerinde ressamlar divarlarda Putinniñ portretlerini yapmağa devam ete. Birinci işi Aqmescitte peyda oldı, bundan soñ ressamlar Yaltağa avuştı, – haber ete Qırım.Aqiqat mühbiri.
Özlerini aveskârlar olaraq tanıtalar ve Qırım şeerlerinde divarlarnı öz teşebbüsi ile boyalağanlarını bildireler.
Ressamlarnıñ sözlerine köre, olar ev divarlarında resimlerni yapıp, aqça qazanalar. Ve öz «#Bizim» leyhasını evelki proektlerinden qalğan boyalar ile yapa ekenler.
Jurnalistler Aqmescitte yapılğan resimge bir 6000 rublege boya kerek olğanını saydı. Bundan soñ «#Bizim» hashtagi ile Putinniñ süreti Yaltada bala hastahanesi divarında ve Krasnoarmeyskaya soqağında yerleşken evniñ divarında peyda oldı. Bundan da ğayrı, bu kibi işler Qırımnıñ diger şeerlerinde de peyda olğandır. İşlerniñ sayısına köre, ressamlarnıñ ticariy proektinden bayağı malzemeleri «qalğandır».
Qaynaqnıñ bildirgenine köre, ressamlar Qırımda Vladimir Putinniñ ziyaretine qadar vatanperver leyhasını azırlamaq içün aselet Moskvadan kelgenler ve olarğa buña aqça ayırılğan edi. Ressamlarnıñ çalışqan er bir şeerinde resim olacaq yerlerni qolaylıqnen şeer memuriyetleri ile al ete ediler.
