Rusiye prezidenti Vladimir Putin Qırımda çoqtan yaşağan qırımtatarlarğa Rusiye vatandaşlığını elde etüv ketişatını qolaylaştırmağa vade etti, amma er keske para yetmeycegine de ima etti. Bu aqta bazarertesi künü, avgust 17-de, TASS bildire.
«Vatandaşlıq aqqında – zenaatdaşlarım ile laf eterim, eger de mında endi çoqtan yaşağan insanlar aqta söz ketse, menimce, Rusiye vatandaşlığını elde etüv ketişatını qolaylaştırmağa mümkün olur», – dey Putin.
O dey ki, Qırım ve qırımtatar halqınıñ içtimaiy-iqtisadiy reabilitatsiyasına ayırılğan vastalarnıñ «bir sıñırlavı bardır» ve insanlarnıñ muayyen sayısına ayırılacaqtır.
«Biz, elbette ki, diger memleketlerden aqım olacağından ve bu aqça yetmeyceginden saqınamız. Bu, ince yağlanğan bir börek kibi olur. Kimse bu aqçadan fayda duymaz», – dedi Putin.
Qırım.Aqiqat bildirgeni kibi, Putin ve Medvedev şimdi ziyaret ile Qırımda buluna.
Ukraina prezidenti Petro Poroşenko Putinniñ Qırım ziyaretini «medeniy dünyağa qarşı areket ve vaziyetniñ beterleşüvi boyunca stsenariyniñ devamı» olaraq adladı.
Ukraina Tış işler nazirligi Rusiye prezidenti Vladimir Putin ve baş naziri Dmitriy Medvedevniñ işğal etilgen Qırım ziyaretine narazılığını bildirdi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
