Rusiye prezidenti Vladimir Putin dey ki, «Qırımda, qırımtatar mevzuatını qullanıp, vaziyetni kerginleşmege tırışqanlar öz siyasiy niyetlerini amelge keçirmege ve aq-uquqlar oğrunda küreşçi olaraq halqara grantlarnı elde etmege istey». Bu aqta Putin Qırımda avgust 17 künü bildirdi, haber ete RİA Krım.
«Siz vaziyetni, esasen qırımtatar mevzuatı ile bağlı vaziyetni kerginleştirmege tırışqanlar aqqında aytqan ediñiz. Kim aqqında söz ketkenini yahşı bilemiz. Özlerini aq-uquqlar oğrunda küreşçi olaraq tanığan bir sıra insan bar. Bu insanlar içün nasıl aq, kimniñ – müim degil. Olarnıñ küreşçi olğanları müim ve bu küreşleri içün halqara grantlarnı, şeref qazanmağa ve öz niyetlerini, siyasiy niyetlerini de, şu cümleden, amelge keçirmege isteyler», – dey Putin.
Bazarertesi künü, avgust 17-de, Yaltada Rusiye prezidenti Vladimir Putin Rusiye Devlet şurası prezidiumınıñ turizm inkişafı boyunca toplaşuvını keçire.
Ukraina prezidenti Petro Poroşenko Rusiye prezidenti Vladimir Putinninniñ Ukraina tarafı ile uyğunlaştırılmağan Qırım ziyaretini – medeniy dünyağa qarşı areket olaraq adladı.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
