Rusiye prezidenti Vladimir Putinniñ işğal etilgen Qırım ziyareti yarımada Rusiye Federatsiyasınıñ qısmı olğanını kösterer, dep tüşüne Aleksandr Sıtin – 2009 senesine qadar Rusiye Tış istihbarat hızmetine kirgen Rusiye strategik araştırmalar institutında 10 yıl devamında çalışqan ekspert.
Bunı o Radіo Svoboda efirinde bildirdi.
«Onıñ ziyareti – Qırım Rusiye terkibine kirgenini kösterecek dep aytar edim», – dey ekspert.
O, Putinniñ Qırım ziyareti vatanperverlikniñ arttırılmasına yol berecegini ve dünyağa kene bir kere Qırım boyunca iç bir muzakerelerniñ olmaycağını hatırlatacağını tüşüne.
«Mesele, elbette, turizm inkişafında degil. Mında eki taraf bar. Biri – içki siyasiy, Qırım işğali ile bağlı vatanperverlik seviyesini kötermek, çünki malüm ki, Rusiye toplulığınıñ büyük qısmında bundan vatanperverlik keyif köterilgen edi. Ve başqa taraftan, bu halqara toplulıqqa bir bildirüv: Rusiye Qırım boyunca iç bir muzakere keçirmeycek ve bu meselede iç bir uyğunlaşuv olamaz», – dey Sıtin.
Evel Kremlniñ matbuat hızmeti Putinniñ avgust 17 künü Qırım ziyareti aqqında bildirdi. Onıñ çerçivesinde Rusiye Federatsiyasında turizm inkişafına bağınşlanğan Devlet şurasınıñ prezidiumı toplanacaq. Putinniñ Qırımnıñ milliy cemaat teşkilâtlarınıñ temsilcileri ile resmiy olmaycaq körüşüvi planlaştırılğanı aqta da bildireler.
