Qırım musulmanları diniy idaresinde acılıqqa azırılıq koreler. Aqmescitniñ №2 şeer hastahanesinde seyyalarnıñ mecburiy aşılavı başlandı. Tibbiy teşkerüvden soñ musulmanlarğa meningitke qarşı mahsus ilâc ile ine sançalar ve halqara standart sertifikatı berile, haber eteler QMDİ matbuat hızmetinde.
Qırımdan acılıqqa 300 acı baracaq, Aqmescitten Medinağa sentâbr 6-8 künleri mahsus kiralanğan uçaq ile çıqacaqlar. Bundan soñ seyyalar Mekkege yol alacaq, mında acılıq etilecektir. Seyyat 20 kün devam etecek.
Aşılamanı Saudiy Arabistan Qırallığına kirmezden eñ az 10 kün evel ve eñ çoq 3 yıl evel yapmaq kerek.
Acılıq – islâmnıñ beş şartlarından biridir. Er bir musulman ayatında bir kere acılıqqa barmağa borcludır.
