«Krımaeronavigatsiya» Qırım şirketi yarımadağa naqliyat irişiminiñ teminlevini eyi derecede becere, dep bildire Qırımnıñ şimdiki başınıñ muavini Mihail Şeremet.
O «Rusiye Federatsiyasında ava areketiniñ teminlevi boyunca devlet şirketi»niñ hadimlerini Rusiye Ava flotunıñ künü ile hayırladı.
Bunı Qırımnıñ rusiyeli ükümetiniñ matbuat hızmeti bildire.
«Qırım içün bu bayramnıñ emiyeti hususiydir. Ava alâqası yarımadanı memleketimizniñ qıtaiy qısmı ile bağlay. Vatandaşlıq aviatsiyası ekseriy allarda sizge bağlı. Siz işbu müim devlet vazifesini muvafaqiyet ile beceresiz», – qayd etti Şeremet.
O hadimlerge Qırımnıñ şimdiki başı Sergey Aksenovdan fahriy yarlıqlarnı berdi.
2014 senesi mart ayında Rusiye yarımadanı işğal etken soñ Qırım ava limanları Ukraina ükümetiniñ qararı ile qapatıldı. Anda kerçekleştirilgen ava seferleri Ukraina qanunlarını ve halqara qaidelerni bozmaqta, böylece ava şirketleri Ukraina ve ICAO halqara cezalarına oğray bile.
Al-azırda yalıñız Rusiye ava şirketleri Qırımğa uçaq seferlerini kerçekleştire.
