Kiyevniñ mahkemesi devlet hainliginde şeklengen Qırım Yuqarı Şurasınıñ sabıq deputatı Vasiliy Ganışnı oktâbr 13-ne qadar apiste qaldırdı. Bu aqta Qırım.Aqiqatqa QMC prokurorınıñ muavini Nazar Holodnitskiy bildirdi.
«Tevqif müddetiniñ uzattırılmasında israr etik, çünki o (Vasiliy Ganış – müel.) ağır cinayetniñ etilmesinde qabaatlana ve mahkemeden qaça bilir. Qıtaiy Ukrainada meskeni yoq, yani, qaçacağınıñ imkâniyeti büyüktir», – dedi Holodnitskiy.
Öz nevbetinde sabıq deputatnıñ advokatı Andrey Rudenko mahkemede cezanıñ lâğu etilmesini talap etti. Qırım.Aqiqatqa bildirgeni kibi, onıñ fikrine köre, Ganışnı SİZOdan sağlığı zayıf olğanından sebep azat etmek kerek.
«Ekinciden, ceza qararı alınğanından soñ, iyün 24-den iç bir yañı malümat peyda olmadı, şunıñ içün o SİZOda boşuna buluna», – dey Rudenko.
Mahkeme Ganışnıñ tevqif müddetini uzatıp, adliyecisiniñ prokuraturağa qabaatlayıcı vesiqanıñ qaytarılması aqta şefaatını qabul etti. Sabıq deputatnıñ imayesi buña israr etti, çünki işbu vesiqada qabaatlanğannıñ sağlıq alı ve 2014 senesi mart 6 künü Qırım Yuqarı Şurasında silâlı Rusiye arbiyleri bar olğanı qayd etilmegen eken.
QMC vesiqanıñ qaytarılması aqta mahkeme qararına itiraz bildirecek ola.
«Mahkemede bildirilgenini doğru tanımaymız. Bazarertesi künü buña itiraz arizası berilecek. Apellâtsion mahkemesi bu işte noqta qoyar, menimce. Anda er şey qanun talaplarına köre yazılğandır», – dey prokurornıñ birinci muavini Nazar Holodnitskiy.
Kiyev şeeriniñ Peçersk rayon mahkemesiniñ mahkemecisi Yuliy Farkoş çarşenbe künü iyün 24-de qıtaiy Ukrainada QMC prokuraturasınıñ sabıq Qırım deputatı Vasiliy Ganışqa tevqif müddetiniñ uzattırılması aqta şefaatını qabul etti. Sabıq deputatnıñ tevqifi avgust 16-na qadar uzattırıldı, prokuratura ise iyül 19-na qadar uzatmağa rica etken edi.
Aprel 28-de Ukraina havfsızlıq hızmeti Ukraina Devlet sıñır hızmeti ile beraber onı Qırım çıqışında yaqaladılar. Ganış apiske alındı, çünki onı qıdıra ediler. Baş prokuratura onı devlet hainliginde şekley. Ukraina taqiqatçılarınıñ malümatına köre, Ganış Qırım statusı aqqında «referendum» keçirilmesine rey bergenlerden biri edi, ve böyle etip Ukraina topraq bütünligine zarar ketirmege tırıştı.
