Link açıqlığı

Aqmescitniñ Kiyev rayon mahkemesi Qırımnıñ Yuqarı mahkemesiniñ qararını lâğu etti ve Qırımtatar Milliy Meclisiniñ reisi muavini Ahtem Çiygoznıñ apiste noyabr 19-na qadar qaldırılması aqta qararını qaytardı.

Bu aqta Meclis reisiniñ muavini İlmi Ümerov bildirdi.

«Fevral 26 devam ete… Bugün Ahtem Çiygoznıñ nevbetteki mahkeme toplaşuvı keçti. Aqmescitniñ Kiyev rayon mahkemesi Qırım Yuqarı mahkemesiniñ qararını lâğu etti ve Ahtemniñ noyabr 19-na qadar apiste bulunuvı aqta qararını qaytardı», – yazdı o Facebookta.

Ümerovnıñ aytqanı kibi, Çiygoz mahkemede çıqışta bulunıp, işbu vaqialarnı evelden neticesi belli olğan sımarlanğan bir iş olaraq adladı. O, ceza qararını deñiştirmek içün daa nasıl kefalet bermege kerek olğanı aqta soradı. Çünki onıñ areket tarzı Qırımdan ketmege niyeti olmağnını köstere. Bunıñ ile Ahtem Çiygoz oña bildirilgen qabaatlarnı tanımağanını qayd etti.

Avgust 10 künü Qırımnıñ Yuqarı mahkemesi Meclis reisiniñ muavini Ahtem Çiygoznıñ apiste bulunuv müddetini avgust 19-na qadar qısqarttı.

Uquq qoruyıcı Eskender Bariyev degeni kibi, Meclis reisiniñ muavini Ahtem Çiygoznıñ apis müddetini avgust 19-na qadar qısqartqan Qırım Yuqarı mahkemesiniñ qararı Rusiye dünyağa işğal etilgen yarımadada bütün uquqiy institut ve mehanizmlerni temin etkenini köstermeli.

Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar. Mayıs 15 künü keçirilgen mahkeme toplaşuvı neticesinde Çiygoznı iyül 29-na qadar apiste qaldırdılar.

Aqmescitniñ Kiyev rayon mahkemesinde iyül 28 künü Rusiye Federatsiyasınıñ Taqiqat komiteti taqiqatçısınıñ Qırımtatar Milliy Meclisi reisiniñ muavini Ahtem Çiygoznıñ apis müddetini uzatmaq aqqında şefaatı boyunca toplaşuv keçti. Mahkeme kene Çiygoznı üç ay ve 21 künge, yani 2015 senesi noyabr 19-na qadar apiste qaldırmağa qarar aldı

Rusiye Qırımnı 2014 senesi mart ayında işğal etti.

XS
SM
MD
LG