BMT Baş assambleyası sentâbrde keçirilecek toplaşuvında Ukrainada Qırım işğali ile bağlı vaziyetni ve Malaysia «Boing» meselesini muzakere etecek. Bunı Meclis azası ve Qırımtatar halqınıñ aq-uquqlarını qorçalav komitetiniñ azası Eskender Bariyev bildire.
«Sentâbrde BMT Baş Assambleyasınıñ toplaşuvı keçecek, mında «Qırım işğali ile bağlı ukrain vaziyeti» ve «tüşürilgen «Boing» faciası» baqılacaq», – yazdı o Facebookta cuma künü, avgust 14-de.
Bunıñ ile Bariyev şunı da qayd etti ki, BMT Havfsızılq Şurasında olğanı kibi, BMT Baş Assambleyasında Rusiye Federatsiyası veto aqqından faydalanıp olamaz.
İşğal etilgen Qırımda qırımtatarlarğa qarşı «mayıs 3» ve «fevral 26» cinaiy işlerniñ açılmasını izaatlap, uquq qoruyıcı dey ki, bunıñ maqsadı – Qırım ealisini, ilk nevbette qırımtatarlarnı qorquzmaqtır. «Bunı yapıp olğanlarını aytmağa mümkün», – dedi Bariyev ve bu cinaiy işler uquq qaidelerine riayet etmegeni içün olarnı qapatmağa kerek olğanını qoştı.
Uquq qoruyıcı degeni kibi, Meclis reisiniñ muavini Ahtem Çiygoznıñ apis müddetini avgust 19-na qadar qısqartqan Qırım Yuqarı mahkemesiniñ qararı Rusiye dünyağa işğal etilgen yarımadada bütün uquqiy institut ve mehanizmlerni temin etkenini köstermeli.
Rusiye Qırımnı 2014 senesi mart ayında işğal etti.
