Bu sene acılıqqa barmağa istegen Qırım musulmanları meningokkok infektsiyasına qarşı aşılamanı yapmalı, – haber ete Qırım musulmanlarınıñ diniy idaresiniñ matbuat hızmeti.
«Krım Media» bildirgeni kibi, bunı seyyalar №2 Aqmescit hastahanesinde ete bilecekler. Olarnı avgust 17-den bir afta devamında qabul etecekler.
Aşılamanı Saudiy Arabistan Qırallığına kirmezden eñ az 10 kün evel ve eñ çoq 3 yıl evel yapmaq kerek.
«Acılıqqa vizanı almaq içün aşılamanıñ yapılması dünyanıñ bir çoq memleketinde şarttır», – haber ete Qırım musulmanlarınıñ diniy idaresiniñ matbuat hızmeti.
Bundan da ğayrı, er bir acığa gripp hastalığına qarşı aşılamanı yapmağa tevsiye eteler. Hususan esli başlı insanlarğa ve ciger, yürek, büyrek hastalığı, şeker hastalığı olğanlarğa.
2015 senesi acılar Saudiy Arabistanğa avgust 16-da kelmege başlaycaq, noyabr 12-ne qadar keri qaytacaqlar.
