Aqmescit mahkemesi yarımadada 2014 senesi fevral 26 künü olğan vaqilar vaqtında «ağır cinayetniñ etilmesinde» qabaatlanğan Ali Asanovnı daa eki ayğa apiste qaldırdı.
«2015 senesi avgust 12 künü «fevral 26» işi boyunca Asanov Aliniñ mahkeme toplaşuvı keçti. Mahkeme tevqif müddetini daa eki ayğa uzattı, 2015 senesi oktâbr 15-ne qadar», – dep bildirdi Qırımtatar halqınıñ aq-uquqlarını qorçalav komitetiniñ azası Eskender Bariyev Facebookta.
Onıñ sözlerine köre, «mahkeme toplaşuvı», aprel ve iyünde olğanı kibi, qapalı rejimde keçti.
Bunıñ ile, çarşenbe künü, avgust 12-de, toplaşuv üyle teneffüsi vaqtında 10 daqqa devamında keçirilgen edi, dey Bariyev.
Aprelde Aqmescitniñ Kiyev rayon mahkemesi Ali Asanovnı apiske aldı. Bu qararnı Asanov qabaatını tanımay, Ukraina vatandaşı ola ve Ukraina qıtasına qaça bile dep añlata ediler. Bundan da ğayrı, mahkeme Asanovnıñ diger cinayetlerge alâqasını teşkerecek oldı.Asanovnıñ üç çağına yetmegen balası ve saqat babası olğanı aqta deliller nazarğa alınmadı. İyünde Asanovnıñ dörtünci balası doğdı.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
