Link açıqlığı

İyünde Ukraina paytahtında işine devam etken ATR qırımtatar telekanalınıñ hadimlerinden çoqusı Kiyevge köçti.

Bunı Qırım.Aqiqatqa ATR telekanalınıñ saibi, iş adamı Lenur İslâmov bildirdi.

«ATR telekanalınıñ (Qırımdaki – QA) büyük qısmı endi mındadır (Kiyevde – QA). Jurnalistler çalışa: biri levha çıqarmaq içün Herson vilâyetiniñ sıñırına ketti, başqası Lvivge. Şimdi Ukraina Yuqarı Şurası ve diger devlet müessiselerine akkreditatsiyanı almaqtamız», – dey İslâmov.

O şunı da qayd etti ki, Kiyevde çalışqan ilk künleri telekanalnıñ hadimler açlığı edi.

«Qırımda jurnalistler ile laf etkende, olar Kiyevge köçmek kibi ğayege şübe ile yanaşqan ediler. Bazıları bu ğaye yahşı olmağanını ayta edi, çünki siziñ beklegen ve körgen Ukrainañız daa yoq eken. Digerleri özleri içün, qıyın saylav olsa da, Vatanda qalmağa qarar aldılar. Amma insanlar, episi bir, kelmekteler (Kiyevge – QA)», – dedi o.

İş adamı telekanalğa, aytqanı kibi, «vatniklerni» almağanını bildirdi.

«Nabziy insanlarnı sevem, özüne yük almağa azır olğan insanlarnı. Bu insanlar er şeyni becerir. Bir şey yapmağanlar, bir şey becerip olamaz. Menim içün vatnik – Qırım – Rusiye olğanını tüşüngen insan. Olarnı daa vatnik-hard ve vatnik-light adlandıram. Vatnik-hard – nazarda tutqanımnı añlaysız. Vatnik-light – em de Kiyevde olar çoqtır – qavğa etmege kerekmey olğanını aytqan soyları, Ukraina yutquzdı degenler, yani o küreşmege azır degildir», – dey İslâmov.

O şunı bildirdi ki, yaqın zamanda ATR Herson ve Lvivde haber merkezlerini açacaqtır, çünki o yerlerde qırımtatarlar yaşay. İslâmov dey ki, Qırımnı «eñ yahşıları» terk ete, amma olarnıñ mıtlaqa yarımadağa qaytacaqlarından emindir.

«Qoyun degil, börü olmağa istegen insanlardır. Şunıñ içün insanlar şimdi Qırımnı terk eteler, amma soñ olar qaytacaq, biz de, ögrenip, tecribemizni paylaşmaq içün yurtumızğa qaytacaqmız. Missiyamız keñleşti», – dey ATR saibi.

ATR qırımtatar telekanalı 2015 senesi aprel 1-den Qırımda işini toqtatmağa mecbur edi. 2015 senesi iyün 17-den kanal Kiyevde işlemege başladı.

XS
SM
MD
LG