Human Rights Watch uquq qoruyıcı teşkilâtınıñ hadimi Yuliya Gorbunova dey ki, Qırım Yuqarı mahkemesiniñ Qırımtatar Milliy Meclisi reisiniñ muavini Ahtem Çiygoznıñ apiste bulunuv müddetiniñ qısqarttırılması aqta qararı – Rusiyege ukrain rejissörı Oleg Sentsov ve Qırım faali Aleksandr Kolçenkonıñ mahkeme ketişatlarından sebep etilgen basqı neticesidir.
Bu aqta Gorbunova Qırım.Aqiqatqa ayttı.
«Şimdi Sentsov ve Kolçenko işlerinden sebep Rusiyegeye hoş kelmegen şamata çoqtır. Belki de, Rusiye akimiyeti basqı duya, esasen halqara toplulıqnıñ tarafından, ve bu kibi adımlar buña bağlı ola bile. Köstermeli bir adım, belki, Qırımda er şey yahşı ve ayırım yoq olğanını köstermek içün», – dey Gorbunova.
Bunıñ ile, Gorbunovanıñ fikrine köre, işbu al vaziyetniñ deñişip kelmesini aks ete bile. «Bu haberge, elbette ki, eyi haberge köre «ava yımşaması» aqqında aytmağa mümkünmi, emin degilim. Çiygoz ve fevral 26 boyunca keçken diger şahıslar ile bağlı adiselerni taqip etmek kerek», – dedi Human Rights Watch tedqiqatçısı.
Avgust 10 künü Qırımnıñ Rusiye Yuqarı mahkemesiniñ Qırımtatar Milliy Meclisiniñ reisi muavininiñ imayesi tarafından berilgen şikâyet arizası boyunca toplaşuvı keçti. Arizada Aqmescitniñ Kiyev rayon mahkemesiniñ Çiygoznı noyabr 19-na qadar apiste qaldırmaq qararını lâğu etmege talap eteler.
Meclis reisiniñ muavini İlmi Ümerov aytqanı kibi, Yuqarı mahkeme ilk sefer prokuraturanıñ talabı ile bütünley ve advokatnıñ ricası ile qısmen razı oldı. Neticede apiste bulunuv müddetini avgust 19-na qısqarttılar.
Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar. Mayıs 15 künü keçirilgen mahkeme toplaşuvı neticesinde Çiygoznı iyül 29-na qadar apiste qaldırdılar.
Aqmescitniñ Kiyev rayon mahkemesinde iyül 28 künü Rusiye Federatsiyasınıñ Taqiqat komiteti taqiqatçısınıñ Qırımtatar Milliy Meclisi reisiniñ muavini Ahtem Çiygoznıñ apis müddetini uzatmaq aqqında şefaatı boyunca toplaşuv keçti. Mahkeme kene Çiygoznı üç ay ve 21 künge, yani 2015 senesi noyabr 19-na qadar apiste qaldırmağa qarar aldı.
