Aqmescitte avgust 11-de aqşam Lenin meydanında Ukraina bayrağı ile foto yapqan Moskva advokatı İrina Birükova öz yaqalanuvı aqta bildire.
Facebookta dostları aşkâr etken malümatqa köre, Birükovağa ve daa bir qaç insanğa, Qırım faali Veldar Şukurciyevge de, şu cümleden, «Lenin abidesi yanında qanunsız tedbirde – Ukraina bayrağı ile foto yapuvda iştiraki içün» protokol tizdiler.
Birazdan Birükovanıñ özü de izaat yazıp, işbu malümatnı tasdiqladı ve tafsilâtlarnı aşkâr etti.
«Dostlar, er şey yahşı. Bizni yolladılar, er birimizge RF Memuriy bozuvlar Kodeksiniñ 20.2 maddesiniñ 5 qısmı boyunca protokollarnı tizdiler. Yarın, ümüt etem ki, evime qaytarım. FSB hadimleri ile subet kerekli kibi olmadı. Olarnıñ suallerine сеvap bermege istek yoq edi», – yazdı advokat.
«E, unuttım! Ukraina ve Rusiye arasında dostluq tarafdarım! Hadimler ise meni bugün Lenin meydanında Ukraina bayrağı – qanunsız olğanına işandırmağa çalışqan ediler», – dedi o.
Qırım uquq qoruyıcı organlarınıñ bu ziddiyet aqta resmiy izaatı şimdilik yoqtır.
Evel mart 9 künü ukrain şairi Taras Şevçenkonıñ hatırasına keçirilgen aktsiyada bir qaç ukrain faali yaqalanğan edi, şu sırada Veldar Şukurciyev.
