Qırımtatar Milliy Meclisi reisiniñ birinci muavini Nariman Celâl dey ki, Qırımnıñ Yuqarı mahkemesiniñ Meclis reisiniñ muavini Ahtem Çiygoznıñ apiste bulunuv müddetini üç ayğa qısqartmaq kibi qararı er kesni «biraz şaşırttı», amma Çiygoz özüniñ azat etilecegine inanmay eken.
Bu aqta Celâl Qırım.Aqiqatqa bildirdi.
«Tuvğanları, yaqınları, dostları bu kibi qararnıñ alınacağını beklemey edi, çünki Ahtem Çiygoznıñ azatlıqta olğanına yarım yıl devamında keder ete ediler. Oña nisbeten bütün qabaatlarnı adaletsiz saya edik ve şimdi de sayamız», – dedi Celâl.
Ahtem Çiygoznıñ özü, Meclis reisiniñ muavini aytqanı kibi, «azat etilecegine pek te inanmay».
«Malümatımızğa köre, Taqiqat komiteti 19-na qadar Çiygoznıñ apis müddetiniñ uzattırılması aqta yañı şefaatını berip, onı apiste qaldıra bile».
Avgust 10 künü Qırımnıñ Rusiye Yuqarı mahkemesiniñ Qırımtatar Milliy Meclisiniñ reisi muavininiñ imayesi tarafından berilgen şikâyet arizası boyunca toplaşuvı keçti. Arizada Aqmescitniñ Kiyev rayon mahkemesiniñ Çiygoznı noyabr 19-na qadar apiste qaldırmaq qararını lâğu etmege talap eteler.
Meclis reisiniñ muavini İlmi Ümerov aytqanı kibi, Yuqarı mahkeme ilk sefer prokuraturanıñ talabı ile bütünley ve advokatnıñ ricası ile qısmen razı oldı. Neticede apiste bulunuv müddetini avgust 19-na qısqarttılar.
Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar. Mayıs 15 künü keçirilgen mahkeme toplaşuvı neticesinde Çiygoznı iyül 29-na qadar apiste qaldırdılar.
Aqmescitniñ Kiyev rayon mahkemesinde iyül 28 künü Rusiye Federatsiyasınıñ Taqiqat komiteti taqiqatçısınıñ Qırımtatar Milliy Meclisi reisiniñ muavini Ahtem Çiygoznıñ apis müddetini uzatmaq aqqında şefaatı boyunca toplaşuv keçti. Mahkeme kene Çiygoznı üç ay ve 21 künge, yani 2015 senesi noyabr 19-na qadar apiste qaldırmağa qarar aldı.
