Qırımnıñ rusiyeli baş nazir muavini Ruslan Balbek Rusiye biometrik çetel pasportlarınıñ berilmesini ilân etti, olarnı birinci nevbette acılıqqa azırlanğan qırımtatarlar elde ete eken.
Bu aqta o RİA Novosti haber agentligine bildire.
«Biometrik çetel pasportlarını 150-den ziyade insan elde etti. Qırım acıları – biometrik pasportlarnı elde etken birinci qırımlılardır». – dey Balbek agentlikke.
Onıñ sözlerine köre, avgust 15-ne qadar pasportlarnı Qırımdan acılıqqa baracaq 300 musulman elde eter.
2015 senesi acılarnıñ Saudiy Arabistanğa kelmesi avgust 16-da başlanır, noyabrniñ 12-ne qadar qaytıp kelmeliler. Saudiy Arabistannıñ akimiyeti er bir memleket içün er yıl seyyalarnıñ sayısını belgiley.
Evel bildirilgeni kibi, Saudiy Arabistan Qırımnıñ acılıqqa baracaq 200 seyyasına maliye destek köstermek niyetindedir. Bu aqta Ukraina prezidentiniñ qırımtatar halqınıñ işlerinden vekâletlisi Mustafa Cemilevniñ Saudiy Arabistan Qıralığınıñ vekâletli elçisi Cudiya Alhazal ile körüşüvinden soñ belli oldı.
2014 senesi Mekkege Qırımnıñ 150 musulmanı barğan edi. Bu sene Qırımda yaşağanlarğa 300 yer ayırıldı.
Acılıq – islâmnıñ beş şartlarından biridir. Er bir musulman ayatında bir kere acılıqqa barmağa borcludır.
