Evel Ukraina içün yunan-roma küreşi boyunca «altın»nı qazanğan qırımlı Emin Seferşayev Sırbistanda keçirilgen Avropa birinciliginde Rusiyeni temsil etti ve altın medalni elde etti. Qırımnıñ Sport nazirliginiñ matbuat hızmeti bildirgeni kibi, Seferşayev Avropa çempionatında Subotitse sırb şeerinde çıqışta bulundı.
«Yarışnıñ final uruşında sportçumız Bulğaristan sportçusını Dimitar Sandovnı 4:2 esabatı ile yeñdi. Tunç mukâfatı saipleri Abdulsamet Basar ve Giovanni Freni oldılar», – denile beyanatta.
Qırım.Aqiqat bildirgeni kibi, idmancı Sergey Popenkovnıñ şegirti Emin Seferşayev Qırım işğalinden evel halqara yarışlarda Ukrainanı temsil ete edi. 2013 senesinde Seferşayev yunan-roma küreşi boyunca Dünya ve Avropa çempionatlarında ğalebe qazanğan edi. Bu ğalebeleri tuvğan şeerinde qayd etilgen edi: Keriçte «Altın grifon» şeer reytinginiñ taqdirlev merasiminde 15 yaşında Emin Seferşayev «Yıl insanı» unvanını aldı.
Qırım.Aqiqat sabıq ukrain sportçusınıñ Avropa birinciliginde iştiraki aqta Ukrainanıñ yunan-roma küreşi federatsiyasından izaat bekley.
