Aqmescit şeer memuriyetinde bildireler ki, Rusiye qanuniyeti mektep binalarınıñ mütenasip qoruları olğanını talap ete eken.
Beyanatqa köre, al-azırda şeerniñ aman-aman er bir mektebi qoralanmaq kerek.
«Mektep etrafında olacaq qoranıñ uzunlığı 5 km olmalı. İşlerniñ tahminiy masrafı 178 million rubleni teşkil ete, daa 130 million ruble mektep ve bala bağçalarında yanğın signalizatsiyasınıñ qoyulmasına kerek», – dedi Aqmescit memuriyeti başını birinci muavini Sergey Krutsük.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
