Link açıqlığı

Qırımtatar Milliy Meclisi reisniñ birinci muavini Nariman Celâl dey ki, Ukraina Baş prokuraturası Qırımnı Ukrainanıñ ayırılmaz qısmı olaraq tanısa, yarımada üzerinde nezaretniñ ğayıp oluvı boyunca mesüliуetli insanlarnı şekley bile. Amma, dey o, evel devlet hainliginde şeklengen Qırım Yuqarı Şurası deputatlarınıñ cedveli qısqartıla bile.

Bunı o Qırım.Aqiqatqa bildirdi.

Celâlnıñ fikrine köre, taqiqat organlarına bu sualge muqaytlıqnen yanaşmaq kerek, çünki, Meclisniñ malümatına binayen, bu işke yalıñız Refat Çubarovnıñ aytqan o eki insannıñ degil de, daa bir qaç insannıñ alâqası yoq.

«Aşkâr etilgen cevdel qısqartıla bile. Prokuraturanıñ taqiq etken areketlerni ögrenmek kerek. Eger de bu yanvar 26 ve 27 künleri olsa, salonda bulunğan deputatlarnıñ sayısı parlamentniñ başı aytqanından daa da az olğanını bilemiz. Kvorum yoq edi. 50-den az deputat toplandı, cedvelde 76 qayd etilgen», – dey Celâl.

Bunıñ ile o «satqınlar cedveline» sebepsiz tüşken deputatlarnıñ adlarını aytmadı. İşbu malümatnı teşkermek kerekligini bildirdi.

Matbuat vastalarında Ukrainada devlet hainliginde şeklengen Qırım Yuqarı Şurasınıñ sabıq deputatlarınıñ adları peyda oldı. Qırımtatar Milliy Meclisiniñ yolbaşçılığı bildirgeni kibi, qıdıruvğa ilân etilgen deputatlar sırasına Ukrainağa qarşı areketlerge qoşlumağan soyları da kirdi. Meclis reisi Refat Çubarovnıñ fikrine köre, «satqınlar cedveline» «Qırım regionları» firqasınıñ sabıq deputatı Enver Abduraimov ve «Qurultay-Ruh» firqasınıñ temsilcisi Safurе Kacametova sebepsiz kirdi.

XS
SM
MD
LG