Ankarada (Türkiye) avgust başında II Bütündünya qırımtatar kongressi vaqtında qırımtatar halqınıñ milliy yetekçisi Mustafa Cemilev aqqında birinci vesiqalı filmni çıqardılar. Çıqaruv taqımı qırımtatar diaspora temsilcileri, uquq qoruyıcılar ve Cemilevnen tanış olğan diger yetekçiler ile körüşip, Türkiyede eki kün keçirdi.
Bunı Qırım.Aqiqatqa2015 senesi baarde filmge para toplanuvını ilân etken «KrımSOS» cemaat teşebbüsinde bildirdiler.
«Aktsiyağa biggggidea plaftormasında 252 göñülli qol tuttı, 156 780 grn toplanıldı. Mütehassıslarnı toplamaq, stsenariy yazmaq ve leyhanıñ başlanuvına azırlanmaq içün üç ay kerek oldı. Dünyanıñ nice memleketinde çıqaracaqlar: Ukraina, Rusiye, Frenkistan, Büyük Britaniya, Litvaniya, Poloniya, AQŞ, Türkiye, Çehiya ve Yaponiyada. Çıqaruv taqımınıñ avgust 1-2 künleri II Bütündünya qırımtatar kongressi çerçivesinde ziyaret etken ilk memleketi – Türkiye oldı», – deyler teşkilâtta.
Mında şunı da qayd ettiler ki, taqım kongress iştirakçileri ile subetlerni keçirdi, olarnıñ arasında Türkiyede Qırımtatarlarnıñ medeniyet ve yardımlaşma dernegi idaresiniñ azası Mükremin Şagin, uquq qoruyıcı, Qırımtatar milliy areket veteranı Ayşe Seytmuratova, Qırımtatarlarnıñ medeniyet ve yardımlaşma derneginiñ reisi Tuncer Kalkay, «Qırım» fondunıñ başı (Türkiye) Mürteza Esenkal, tarih ilimler doktorı, Bilkent universitetiniñ professorı, qırımtatar zemaneviy diasporasınıñ korümli temsilcilerinden biri Hakan Qırımlı bar edi.
«Film süjeti çerçivesinde çıqaruv taqımı ayrı insanlar içün Mustafa Cemilev kim olğanı aqqında, qayda ve nasıl olar onıñ aqqında bildi kibi suallerine cevap qıdırdı», – deyler «KrımSOS»ta.
Böylece, Tuncer Kalkay aytqanı kibi, «Mustafa ağanı ne qadar çoq bilseñ, o qadar da çoq qırımtatar halqını sevmege başlaysıñ».
İntervyü iştirakçileri Türkiye matbuat vastaları sügünlik, Mustafa Cemilevge qol tutuv mitinglerniñ keçirilmesini aydınlatqanı aqqında da tarif ettiler.
«Mustafa» – Mustafa Cemilev aqqında ilk vesiqalı film. Maqsadı – cemaatçılıqqa qırımtatarlarnıñ küreşini, ar-namus, menligini aks etken ukrain siyasetçisiniñ canlı tarihı aqqında tarif etmek. «Mustafa» leyhası üzerinde prodüser, «KrımSOS» cemaat teşebbüsçisiniñ tesisçisi ve koordinatorı Tamila Taşeva, ukrain bestekârı, pianinocı, sound-prodüser Fima Çupakin, ukrain jurnalisti, publitsist, tarihçı Vahtang Kipiani çalışalar. Filmni 2016 senesi aprel ayında kösterecek olalar.
