Qırımnıñ rusiyeli akimiyetiniñ başı Sergey Aksenov Qırımnı halqara seviyede «tanıtmaq» içün çetel ziyaretlerini planlaştıra. Bu aqta Qırımnıñ rusiyeli Nazirler şurasınıñ reisi muavini Georgiy Muradov bildirdi, haber ete Qırım ükümetiniñ matbuat hızmeti.
Onıñ sözlerine köre, Aksenovnıñ «Qırım Cumhuriyetiniñ teşviqatı boyunca bir sıra halqara forumlarda iştiraki beklenile, şu cümleden Qıtay Halq Cumhuriyetinde, Ermenistanda».
«Böyle forumlarnıñ muayyen neticeleri ola. Biz, elbette, tış ticaret sisteması üzerinde faal çalışmalımız», – dedi Muradov.
Muradov aytqanı kibi, Qırımnıñ «tış iqtisadiy faaliyetinde ilerileme qayd etile». Bu sırada o «Yalta iqtisadiy forumında» añılğan bir qaç leyhanı hatırlattı.
Aynı zamanda nasıldır bir muayyen leyha ya da yatırımcılar aqta o bir şey aytmadı.
«Qırımğa çeşit siyasiy erbaplarnıñ ziyaretlerinden tesir müsbet ola. Frenklerden ğayrı mında almanlar, italyanlar da kelecek ola. Bunıñ artından tış iqtisadiy faaliyetniñ ilerilemesi de kele. Şunıñ içün, çeşit sanktsiyalarğa baqmadan, ğarbiy-avropalı şeriklerimiz ile leyhalarımız muvafaqiyetli olacağına ümüt besleymiz», – dey Muradov.
Evel «Yalta-İnturist» musafirhanesinde açılğan «Krım-2015» yatırım-qurucılıq forumı iştirakçilerniñ beklenilgen sayısını toplamadı ve aynı sırada Qırım akimiyetinden de diqqatqa nail olmadı.
