Qırımtatar Milliy Meclisniñ reisi, Ukraina Yuqarı Şurasınnı deputatı Refat Çubarov Rusiye-Gürcistan arasında cenkniñ yıllığında 2008 senesi gürci vaqialarını «ezberlenmegen ders» olaraq adladı. Çubarov dey ki, o vaqıt dünya toplulığınıñ qattı mevamı olmağanından sebep, Rusiyeniñ 2014 senesi Qırımnı işğal etmege ve Donbass vaziyetini kerginleştirmege imkânı peyda oldı.
«Ah-vah çekip, halqara toplulıq tezden raat oldı ve birazdan kene Putinnen teñ uquqlı şerik olaraq munasebet qurmağa başladı… 2014 senesi fevral ayında Rusiye, Qırımnı işğal etip ve Donetsk ve Lugansk vilâyetlerinde qanlı qıyır-çıyırnı başlap, kene de halqara toplulıqnı şaşırttı… Endi Ukraina Rusiye qurbanı oldı», – yazdı deputat Facebookta.
«İşğal etilgen Qırım ve onıñ sakinleri Kremlniñ hasta siyasetiniñ reineleri oldı», – dey Çubarov.
Cumaertesi künü, avgust 8-de, Rusiye ve Gürcistan arasında arbiy ziddiyetniñ başlanuvına 7 yıl tolды.
2008 senesi avgust 8-ne keçer gecesi Tbilisiniñ öz başına ilân etilgen Cenübiy Оsetiya ve Abhaziya cumhuriyetleri üzerinde nezaretini tiklemek ıntıluvından soñ Gürcistanğa Rusiye küçleri kirdi.
Bazı qaynaqlarğa köre, tahminen biñ insan ziddiyet qurbanı oldı.
5 künlük cenkniñ neticesinde Rusiye Gürcistannıñ eki regionı – Abhaziya ve Cenübiy Оsetiyanıñ mustaqilligini tanıdı ve işbu territoriyalarda öz arbiy bazalarına qoşma ordu ve silâlandıruvını kirsetti. Dünya devletleri – Rusiye, Venesuela, Nikaragua ve Naurudan ğayrı – bu territoriyalarnı Rusiye tarafından işğal etilgen Gürcistan toprağı olaraq tanıy.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
