Türkiyede qırımtatar diasporası qırımtatar abidesi – büyük saatnıñ yoq etilmesinden kederlene. Onı avgust 5-de gece Derince belediyesiniñ küçleri ile yıqtırdılar, haber ete QHA.
«Bu meydannı qırımtatarlarğa sadıqlıq hatırası olaraq qurdıq. Atatürk zamanında mında Konstantsadan kelgen qırımtatarlarğa topraq berile edi. Derince olardan başlap meskün yer oldı. Qırımtatar abidesi qırımtatarlarnıñ ilk yerleşken yerinde tura edi. Aynı şu sebepten bu yerni saylağan ediler», – dedi neşirge Derince belediyesiniñ sabıq başı Aziz Alemdar.
Qırımtatarlarnıñ medeniyet ve yardımlaşma derneginiñ Kocaeli bölüginiñ başı Suavi Oktay aytqanı kibi, em saatta, em meydan mimarcılığında qırımtatar elementleri qullanılğan. Saatnıñ er tarafından qırımtatar timsali – tamğa tasvir etilgen edi. Tamğa saatqa yaqın olğan banklarnıñ binalarında da tiklengen edi.
