Qırımnıñ rusiyeli prokuraturası «ekstremist mündericesi» olğan 30 saytnı blok etti. Bu aqta studentler ile körüşüvde Qırımnıñ rusiyeli prokurorı Natalya Poklonskaya bildirdi, haber ete «Krıminform».
«Böyle saytlarnı blok etmek ve kesmege kerek», – dey Poklonskaya.
Onıñ sözlerine köre, blok etüv ceryanına binayen ekstremizmge qarşı merkezge, FSBge muracaat etmek kerek. Soñra taqiqat keçirile ve malümatlarnı Baş prokuraturağa yollaylar.
Saytlarnıñ serlevalarını Poklonskaya qayd etmedi.
Bildirilgeni kibi, Qırım akimiyeti aprel 1-ne qadar «terroristik ve ekstremist malümatlardan» ibaret internet saytlarnıñ blok etilmesi boyunca işni soñuna ketirmege planlaştırğan edi.
Mayıs başında Rusiye prezidenti Vladimir Putin matbuat vastalarında terrorizm ve ekstremizmge çağıruvlar içün cezalarnı arttırğan qanunnı imzaladı.
