Ukraina Baş prokuraturası yanında QMC prokurorınıñ muavini Nazar Holodnitskiy Ukraina ögünde özlerini qabaatsız sayğan Qırım Yuqarı Şurasınıñ sabıq deputatlarına QMC prokuraturasınıñ organlarına kelmege teklif etti.
Bu aqta o Facebookta Ukraina halq deputatı, Qırımtatar Milliy Meclisiniñ reisi Refat Çubarovnıñ qıdıruvğa ilân etilgen sabıq Qırım deputatlarınıñ cedvelinden Enver Abduraimov ve Safure Kacametovanı çıqarmaq talabına cevabında yazdı.
«Cedvelni er kes körip, qıymet kessin, dep aşkâr ettiler. Belki de cevdelde özlerini qabaatsız sayğan deputatlar da bar. Olarğa Qırım MC prokuraturasına kelip, delillerni köstermege teklif etem», – yazdı Holodnitskiy.
«Aynı zamanda, belki bir kimsede bu cedvelde olmağan, amma içine mıtlaqa kirecek deputatlar aqqında malümat bar. Prokuraturağa işbu malümatnı taqdim etmege teklifinde bulunam», – dep qoştı o.
Halq deputatı, Meclis reisi Refat Çubarov devlet hainliginde şeklengen Qırım deputatları cedvelinden eki qırımtatarnıñ çıqaruvında israr ete – Enver Abduraimov ve Safure Kacemetova.
Onıñ sözlerine köre, Abduraimov ve Kacametova, Meclis qararına riayet etip, QMC Yuqarı Şurasınıñ nevbetteki (2014 senesi fevral 27-den soñ) toplaşuvlarında ve 2014 senesi mart 15 künü Ukraina Yuqarı Şurası tarafından «Qırım Muhtar Cumhuriyetiniñ Yuqarı Şurası vekâletleriniñ müddetten evel toqtatıluvı aqta» №891 qararınıñ alınuvından soñ endi qanunsız «Qırım devlet şurası» «toplaşuvlarında» iştirak etmey ediler.
Bu sebepten Meclis reisi işbu deputatlarnıñ QMC prokuraturasınıñ cevdeline kirsetilmyesini qanunsız saya.
Ukraina Yuqarı Şurası fevral 13 künü baş prokuraturağa muracaat etip, mart 16-da «referendum»nıñ keçirilmesine alâqası olğan Qırım Yuqarı Şurası ve Aqyar şeer şurasınıñ deputatlarını mesüliyetke çekmege talap etti.
Cevdelde Qırım parlamentiniñ 75 deputatı bar. Daa biri – Vasiliy Ganış aprel 28 künü Qırım çıqışında Ukraina Havfsızlıq Hızmeti ve Ukraina Delvet sıñır hızmetiniñ hadimleri tarafından yaqalandı.
