Halq deputatı, Meclis reisi Refat Çubarov devlet hainliginde şeklengen Qırım deputatları cedvelinden eki qırımtatarnıñ çıqaruvında israr ete – Enver Abduraimov ve Safure Kacemetova.
«Muhtar Cumhuriyeti prokuraturası tarafından tizilgen «Devlet hainliginde şeklengen ve qıdıruvğa ilân etilgen Qırım Muhtar Cumhuriyeti Yuqarı Radasınıñ sabıq deputatları cedvelinde» Abduraimov Enver (Ukraina regionları Firqasınıñ deputat gruppası) ve Kacametova Safureniñ (Qurultay-RUH» deputat gruppası) adları bar. Olar 2014 senesi fevral 27 künü keçirilgen QMC Yuqarı Radasınıñ qanunsız nevbetten tış sessiyasına öz qarşılığını bildirgen ediler ve onıñ işinde iştirak etmediler», – yazdı Çubarov Facebookta avgust 6 künü.
Onıñ sözlerine köre, Abduraimov ve Kacametova, Meclis qararına riayet etip, QMC Yuqarı Şurasınıñ nevbetteki (2014 senesi fevral 27-den soñ) toplaşuvlarında ve 2014 senesi mart 15 künü Ukraina Yuqarı Şurası tarafından «Qırım Muhtar Cumhuriyetiniñ Yuqarı Şurası vekâletleriniñ müddetten evel toqtatıluvı aqta» №891 qararınıñ alınuvından soñ endi qanunsız «Qırım devlet şurası» «toplaşuvlarında» iştirak etmey ediler.
Bu sebepten Meclis reisi işbu deputatlarnıñ QMC prokuraturasınıñ cevdeline kirsetilmyesini qanunsız saya.
Ukraina Yuqarı Şurası fevral 13 künü baş prokuraturağa muracaat etip, mart 16-da «referendum»nıñ keçirilmesine alâqası olğan Qırım Yuqarı Şurası ve Aqyar şeer şurasınıñ deputatlarını mesüliyetke çekmege talap etti.
Cevdelde Qırım parlamentiniñ 75 deputatı bar. Daa biri – Vasiliy Ganış aprel 28 künü Qırım çıqışında Ukraina Havfsızlıq Hızmeti ve Ukraina Delvet sıñır hızmetiniñ hadimleri tarafından yaqalandı.
