«Оmega» Sankt-Peterburg şirketi Yaltada soqaqlarnıñ dekorativ yarıqlatuvı ile oğraşa. Çarşenbe künü, avgust 5 künü, Yalta memuriyetiniñ rusiyeli başı Andrey Rostenko avada evler arasında asılğan çeşit renkli şemsiyeler ile yarıqlanğan birinci soqaqnı taqdim etti.
«Yalta soqağını böyle şekilde yarıqlatmaq ğaye peyda oldı. Metsenat tapıldı, onıñ esabına Yaltanı turistler içün daa da çekici etmege tırıştıq. Balalarnıñ reaktsiyasını körgende, bu ğaye tam kelişken bir şey olğanını ayta bilemiz. Endi kelgenler soqaq adını bilmese de, körüşüvlerni «Şemsiyeler soqağında» keçire bilecekler», – dey Rostenko.
Malümatqa köre, nevbette Krasnov, Çehov soqaqları ve şeer memuriyeti binasından yalı kenarına qadar keçit.
