Link açıqlığı

Ukrainada akimiyetni keñeşçiler yardımı ile köçip kelgenlerniñ meseleleri aqta haberdar etecekler


2015 senesi avgusttan başlap köçip kelgenlerniñ meseleleri boyunca 27 keñeşçi Ukraina meskün yerlerinde yerli akimiyet organları ve İçtimaiy siyaset nazirliginiñ işini nezaret etecek. Programmanı avgust 6 künü Ukraina Nazirler Kabinetinde taqdim etecekler, haber ete «KrımSOS» teşebbüsi.

Teşkilâtta bildirilgeni kibi, programmanı Ukraina İçtimaiy siyaseti nazirliginiñ fevqulâde vazetlerde zarar körgenlerniñ içtimaiy qoruvı teşkilâtınıñ idare reisi Sergey Maruşçenko ve «KrımSOS» reberi Tamila Taşeva taqdim etecekler.

«Programma köçip kelgenlerniñ ve Ukraina meskün yerlerinde yaşağan diger toplulıqlarnıñ esas meselelerini çezecektir. Keñeşçiler köçip kelgenler ve İçtimaiy siyaset nazirligi arasında bağlayıcı olurlar. Olar köçip kelgenlerniñ içtimaiy qoruvı ile bağlı haberlerniñ tez sürette yetip kelmesini ve al etilmesini teminlerler», – dep añlatalar cemaatçılar.

Keñeşçilerni köçip kelgenlerniñ meseleleri ile oğraşqan cemaat erbapları ya da içtimaiy qoruv saasında işlegen insanlardan açıq yarış vastası ile saylaycaqlar. Programmağa köre, işke 27 keñeşçi başlaycaq: 4 – merkeziy seviyede, 23 – departament ve rayonlar seviyesinde. Taqımnıñ bir 40% qadınlar teşkil etecek.

Leyha teşkilâtçıları – Ukraina içtimaiy siyaseti nazirligi, «KrımSOS» teşebbüsi, Büyük Britaniya ükümetiniñ destegi ile Stabilization Support Services halqara teşkilâtı.

XS
SM
MD
LG