İşğal etilgen Qırımda ukrain ordusından zapt etilgen arbiy tehnikanıñ areket etüvi qayd etile, dep bildire Qırımtatar Milliy Meclisiniñ reisi Refat Çubarov.
«Soñ künleri Qırım yollarında 2014 senesi Rusiye işğalcileri tarafından zapt etilgen ukrain arbiy tehnikasınıñ areket etüvi qayd etile. Nezaretçilerniñ aytqanı kibi, bu tehnika Donetsk ve Lugansk vilâyetlerinde bir sıra rayonı öz nezareti altında tutqan boyeviklerge bermek içün Rusiye qıtasına yollay bileler», – yazdı o Facebookta çarşenbe künü.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
