Qırımtatar halqınıñ aq-uquqlarını qorçalav komitetiniñ koordinatorı, sovet dissidenti Sinaver Kadırov dey ki, Ankarada II Bütündünya qırımtatar kongressinde Qırım eyeytiniñ olması işbu tedbirni qanuniyleştirdi.
«Kongressniñ olğanına memnünim. Soñ vaqıtları Qırım eyyetine kirecek insanlarnıñ sayısı az ola bileceginden qorqu bar edi. Çünki basqı başlandı, Kongressten bir qaç kün evel çeşit malümat kele edi. Meclis azalarınıñ kelip olamağanı buña delildir. Ne içün Qırımdan kelgen büyük eyyetiniñ olmasına quvanam, çünki bu Kongressni qanuniyleştirdi. Aks alda diasporalarnıñ Kongressi olacaq edi», – dedi Kadırov Qırım.Aqiqatqa.
Kongresste qabul etilgen muracaatlarnıñ, şu cümleden qırımtatar halqına olğan muracaat aqqında aytıp, vekil «bir yol haritası»nıñ olmaq kerekligini qayd etti.
«İş alıp barılmalı ve bu işni Kongress tesisçileri olğan cemaat teşkilâtları alıp barmaq kerek. Ankarada bulunğanlar ğayeviy işni alıp barmalı ve Kongresste belgilengen strategik yolaqnı amelge keçirmeli», – dep qoştı Kadırov.
Avgust başında Türkiye paytahtı Ankarada II Bütündünya qırımtatar kongressi keçirildi. Mında qırımtatarlarnıñ Vatanı – Qırımdaki vaziyetleri muzakere etildi. Toplaşuv devamında Kongress prezidentini sayladılar ve dünya toplulığı, qırımtatarlarğa bir sıra muracaat ve beyanname qabul etildi.
Qırımnıñ rusiyeli Devlet şurasınıñ «Yedinaya Rossiya» firqasından deputatı Lentun Bezaziуеv Ankarada raatlıq künleri keçirilgen Bütündünya qırımtatar kongressini «siyasiy macera» olaraq adladı.
